Referendum üzrə “Yeni Azərbaycan” təşviqat qrupunun Nizami rayon şöbəsində təşviqat kampaniyası çərçivəsində tədbir keçirildi

Sentyabrın 26-da keçiriləcək Referendumla əlaqədar Azərbaycanda start verilən təşviqat kampaniyasına böyük ruh yüksəkliyi ilə qoşulan referendum üzrə “Yeni Azərbaycan” təşviqat qrupunun Nizami rayon şöbəsində 05 sentyabr 2016-cı il tarixində tədbir keçirildi.

Referendum üzrə “Yeni Azərbaycan” təşviqat qrupunun Nizami rayon şöbəsinin sədri, təşviqat qrupunun səlahiyyətli nümayəndəsi, Milli Məclisin deputatı Sədaqət Vəliyeva çıxışında qeyd etdi ki, Azərbaycan Respublikasının Konstitusiyasına təklif edilən dəyişikliklər ölkədə insan hüquq və azadlıqlarının konstitusion təminatının daha da gücləndirilməsinə, demokratik təsisatların fəaliyyətinin və bütövlükdə idarəetmə sisteminin təkmilləşdirilməsinə xidmət göstərir. Konstitusiyaya təklif olunan dəyişikliklər Azərbaycan Respublikasının bəyan etdiyi demokratiyanın inkişafı konsepsiyasına uyğundur.

Bildirildi ki, müstəqil Azərbaycanın ilk Konstitusiyası 1995-ci il noyabr ayının 12-də ümumxalq səsverməsilə qəbul edilib. 5 bölmə, 12 fəsil və 158 maddədən ibarət olan Konstitusiyamıza iki dəfə referendum yolu ilə dəyişikliklər edilib. Birinci dəfə 24 avqust 2002-ci ildə 22 maddəsinə 31, ikinci dəfə isə 18 mart 2009-cu ildə 9 maddəsinə 41 əlavə və dəyişikliklər edilib. Məhz, edilən əlavə və dəyişiklər hər dəfə ölkənin siyasi sisteminin möhkəmlənməsinə, iqtisadiyyatının, sosial münasibətlərin güclənməsinə, insanların hüquq və azadlıqlarının daha etibarlı şəkildə qorunmasına şərait yaradıb.

Çıxış edən “Yeni Azərbaycan” təşviqat qrupunun Səbail rayon şöbəsinin sədri, təşviqat qrupunun səlahiyyətli nümayəndəsi, Milli Məclisin deputatı prof. Şəmsəddin Hacıyev vurğuladı ki, bu gün dövlətimizin siyasi-hüquqi və sosial-iqtisadi baxımdan inkişafının sürətlə getməsi, Azərbaycanın regionun lider ölkəsi kimi transmilli layihələrin təşəbbüskarı və reallaşdırıcısı kimi qlobal əhəmiyyətli dövlətə çevrilməsi, ölkəmizin böyük dövlətlərin diqqət mərkəzində olaraq müsbət və mənfi tendensiyaların əsas hədəfinə çevrilməsi təklif olunan hüquqi dəyişikliklərin həyata keçirilməsini günün tələbinə çevirir. Bu dəyişikliklər Azərbaycanın inkişafını keyfiyyətcə yeni mərhələyə daşıyacaq və dövlətçiliyimizin təhlükəsizliyini də təmin edəcəkdir.

Hüquqşünas Nəsib Şükürov diqqətə çatdırdı ki, sosial-iqtisadi sahənin daha da inkişaf etdirilməsi, siyasi sistemin təkmilləşdirilməsi, ölkənin təhlükəsizliyinin, milli maraqlarının və insanların hüquq və azadlıqlarının daha etibarlı şəkildə qorunması, xarici təhdidlərin qarşısının alınması, etnik-dini harmoniyanın daha da möhkəmləndirilməsi və s. amillərdən irəli gələrək Azərbaycan daha bir referenduma gedir. Bu baxımdan da Konstitusiyaya təklif edilən dəyişikliklər günün reallığıdır, ölkənin inkişafına, respublikanın gücünün, qüdrətinin artmasına, onun təhlükəsizlik sisteminin möhkəmlənməsinə xidmət göstərən amillərdən biridir. Təklif olunan layihədə isə Konstitusiyanın 23 maddəsinə düzəliş olunması və 6 yeni maddənin əlavə edilməsi təklif olunur.

YAP Nizami rayon təşkilatının idarə heyətinin üzvü Tofiq Rüstəmli və başqaları bildirdilər ki, referenduma çıxarılan məsələlər dövlətin və cəmiyyətin ən mühüm sahələrini əhatə edir. Dövlət, ictimai münasibətlər inkişaf etdikcə bu münasibətləri tənzimləyən hüquq normaları da dəyişməli və mövcud şəraitə uyğunlaşdırılmalıdır. Həyat hüququn arxasınca deyil, hüquq həyatın arxasınca getməlidir.

Tədbirdə rəyi soruşulan seçicilər də bildirdilər ki, onlar dövlətimizin inkişafı, dövlətçiliyimizin möhkəmləndirilməsi üçün uğurlu daxili və xarici siyasət yürüdən Prezident İlham Əliyevin Sərəncamını alqışlayır, dəstəyini ifadə edir və Konstitusiyaya təklif olunan dəyişikliklərə “hə” deyirlər.