Yeni Azərbaycan Partiyası Səbail rayon təşkilatı

Noyabrın 26-da YAP Səbail rayon təşkilatının kollektivi və rayon ictimaiyyəti nümayəndələri Akademik Milli Dram Teatrında yazıçı-dramaturq Hüseynbala Mirələmovun “Axirətdən gələn zəng” pyesi əsasında səhnələşdirilən “Vəsiyyət” tamaşasını izlədilər.

Səhnə əsərinin nümayişində YAP Səbail rayon təşkilatının rəhbərliyi, Rayon Şurası və İdarə Heyətinin üzvləri, rayon ictimaiyyəti nümayəndələri, partiya fəalları və çoxlu sayda gənclər iştirak etdilər. Bu kollektiv sosial tədbir partiya təşkilatının təşəbbüsü ilə baş tutdu. Belə ki, YAP Səbail rayon təşkilatı hər zaman aparat işçilərinin və partiya fəallarının asudə vaxtının səmərəli təşkili, gənclərin vətənpərvərlik ruhunda, milli adət-ənənələrimizə sadiq şəkildə tərbiyə olunması və intellektual səviyyəsinin artırılması istiqamətində rayonda çoxsaylı mədəni-kütləvi tədbirlərin keçirilməsinə xüsusi önəm verir.

İki hissəli qara komediyanın quruluşçu rejissoru əməkdar artist Firudin Məhərrəmov, rejissoru Əlif Cahangirli, quruluşçu rəssamı xalq rəssamı, dövlət mükafatı laureatı Nazim Bəykişiyev, musiqi tərtibatçısı Kamil İsmayılovdur. Səhnə əsərində əməkdar artistlər Abbas Qəhrəmanov (Dövran), aktrisa Ləman İmanova (Röya), əməkdar artist Mirzə Ağabəyli, Almaz Amanova (Zəhra), Sevinc Əliyeva (Ceyran), aktyorlar Rüstəm Rüstəmov (Pirim), Elçin Əfəndi (Samir), əməkdar artist Kazım Həsənquliyev (Elman), İlahə Həsənova (Delisay) və əməkdar artist Aslan Şirin çıxış etdilər.

Tamaşa boyunca aktyorların oyununu gurultulu alqışlarla müşaiyət edən izləyicilər sonda müəllifə və bütün aktyorlara təşəkkürlərini ayaq üstə alqışlar və gül dəstələri ilə bildirərək onları təbrik etdilər.

Çıxış edən Milli Məclisin deputatı, YAP Səbail rayon təşkilatının sədri prof. Şəmsəddin Hacıyev tamaşanın uğurlu nümayişi münasibətilə müəllifi və aktyorları təbrik edərək bildirdi ki, yazıçı-dramaturq Hüseynbala Mirələmovun bu yeni əsərinin premyerasının yaxın zamanlarda olmasına baxmayaraq, “Vəsiyyət” tamaşası izləyicilər arasında artıq böyük təqdir toplamışdır. Səhnə əsərində son illərdə Azərbaycan cəmiyyətində insanlar arasında müşahidə olunan mənəvi-psixoloji münasibətlərin reallığa uyğun olaraq çox gözəl əks olunduğunu diqqətə çatdıran sədr xüsusi qeyd etdi ki, əsasən gənclərin üstünlük təşkil etdiyi seyircilər də tamaşa boyunca məhz bu psixoloji məqamlarda aktyorların məharətli oyununu alqışlamışlar. Müəllifə, aktyorlara cansağlığı, işlərində uğurlar arzu edən Ş.Hacıyev Hüseynbala Mirələmovdan bundan sonra da belə gözəl əsərlər gözlədiklərini və YAP Səbail rayon təşkilatının bu səpkidə mədəni-kütləvi tədbirlərin təşkilinə gələcəkdə də davam edəcəyini bildirdi.

Aktyorların yüksək artislik məharətinin tamaşaçılar tərəfindən böyük rəğbətlə qarşılandığı “Vəsiyyət” tamaşasından hər kəs xoş təəssüratlarla ayrıldı.

 

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•