Yeni Azərbaycan Partiyası Səbail rayon təşkilatı

Dekabrın 29-da YAP Səbail rayon təşkilatının qərargahında “31 dekabr – Dünya Azərbaycanlılarının Həmrəylik Günü” və Yeni il bayramı münasibətilə tədbir keçirildi.

Partiya təşkilatının Rayon Şurası və İdarə Heyəti üzvlərinin, rayon ictimaiyyəti nümayəndələrinin, gənclərin və partiya fəallarının iştirak etdiyi tədbirdə Milli Məclisin deputatı, YAP Səbail rayon təşkilatının sədri prof. Şəmsəddin Hacıyev çıxış etdi.

Tədbir iştirakçılarını qarşıdan gələn bayramlar münasibətilə səmimi qəlbdən təbrik edən sədr 2016-cı ildə ölkəmizin ictimai-siyasi həyatında baş verən proseslər, il ərzində əldə olunmuş nailiyyətlər haqqında danışdı. Dünya ölkələrində baş verən gərginliklər, maliyyə böhranları ilə yadda qalan 2016-cı ildə yaxın coğrafiyamızda gedən hərbi münaqişələr, miqrasiya problemlərinə toxunan millət vəkili qeyd etdi ki, Azərbaycanda da təəssüf ki, bu il ərzində iqtisadi artım tempində, milli gəlirdə azalmalar müşahidə olunmuşdur. Buna baxmayaraq, cənab Prezident İlham Əliyev tərəfindən aparılan və xalqımızın milli mənafelərinə xidmət edən düşünülmüş siyasət nəticəsində ölkəmizdə siyasi və iqtisadi sabitlik qorunub saxlanılmış, regionların sosial-iqtisadi inkişafında uğurlu irəliləyişlər qeydə alınmış, daxili investisiya həcmi artmış, Azərbaycan ordusu daha da güclənmişdir. 2016-cı ilin aprelində cəbhə bölgəsində baş verən hadisələr bir daha göstərdi ki, Azərbaycan işğal olunmuş ərazilərini istənilən vasitələrlə azad etmək əzmindədir, ölkəmizdə sarsılmaz xalq-ordu-iqtidar birliyi mövcuddur.

Azərbaycanın fəxr olunacaq və qürur duyulacaq qədim dövlətçilik tarixindən geniş bəhs edən Ş.Hacıyev xalqımızın milli-mənəvi dəyərlərini Sovetlər dönəmində də qorumağa nail olmasından, Azərbaycan Respublikasının müstəqillik qazandığı dövrün çətinliklərindən, Azərbaycanın parçalanmaq və 1990-1993-cü illərdə Azərbaycan adlı dövlətin dünya siyasi xəritəsindən silinmə təhlükəsi ilə üz-üzə qalmasından danışdı. Ulu Öndər Heydər Əliyevin o çətin dövrdə yürütdüyü ardıcıl, sistemli siyasət nəticəsində ölkəmizdə yeni ictimai quruluş, iqtisadi sistem formalaşdı, ölkəyə xarici investisiya cəlb olundu, Azərbaycanın davamlı və dayanıqlı inkişafı üçün möhkəm institusional sistem yaradıldı. Dahi rəhbər Heydər Əliyevin xarici ölkələrdə yaşayan azərbaycanlıların həmrəyliyi və birliyi gününü təsis etməsi, diaspora ilə işin təşkilinin bünövrələrini qoyması, 2001-ci ildə Dünya Azərbaycanlılarının ilk Qurultayının keçirilməsi kimi tarixi xidmətləri barədə geniş məlumat verən millət vəkili xüsusi vurğuladı ki, bütün bu işlər azərbaycançılıq məfkurəsinin möhkəmləndirilməsində müstəsna rol oynamışdır.

2004-cü ildən başlayaraq Azərbaycanın tamamilə yeni inkişaf dövrünə qədəm qoyduğunu qeyd edən Ş.Hacıyev 2006, 2011 və 2016-cı illərdə keçirilmiş dünya azərbaycanlılarının qurultaylarında müzakirə olunan məsələlər və alınmış qərarlar haqqında məlumatları tədbir iştirakçılarının diqqətinə çatdırdı. Diaspora təşkilatlarına göstərilən dövlət dəstəyinin əhəmiyyətindən danışan deputat qeyd etdi ki, Azərbaycan həqiqətlərini dünya ictimaiyyətinə düzgün çatdırmaq üçün xaricdəki diasporalarımız güclü olmalı və diaspora təşkilatlarımız arasında ciddi koordinasiya təmin olunmalıdır.

Daha sonra tədbir iştirakçıları YAP Səbail rayon təşkilatının çoxminlik üzvləri adından “91-lər”in nümayəndəsi, YAP Səbail rayon təşkilatının İdarə Heyətinin üzvü Hacan Hacıyevi 70 illik yubileyi münasibətilə təbrik etdilər, ona uzun ömür, cansağlığı arzuladılar. Təbrik üçün təşəkkür edən Hacan Hacıyev 31 dekabr tarixinin Azərbaycan xalqı üçün əlamətdar gün olmasından, 1989-cu ildə məhz bu tarixdə İranla Azərbaycan sərhədində tikanlı məftillərin sökülməsindən və bu önəmli tarixin əbədiləşdirilməsi ilə bağlı Ulu Öndər Heydər Əliyevin uzaqgörən siyasətindən danışdı.

Sonda 2016-cı ildə Səbail rayonunun ictimai-siyasi və sosial-mədəni həyatında fəal iştirak edən partiya üzvlərinin rayon təşkilatının Fəxri Fərmanları ilə mükafatlandırılması mərasimi keçirildi.

Tədbirin videoyazısı
SəsTV

 

• 
• 
• 
• 
• 
• 
• 
• 
•