Yeni Azərbaycan Partiyası Səbail rayon təşkilatı

09 fevral tarixində YAP Səbail rayon “Xalçaçılar” ərazi ilk partiya təşkilatında hesabat-seçki yığıncağı keçirildi. İlk öncə torpaqlarımız uğrunda canlarından keçmiş şəhidlərimizin, Azərbaycanın Milli Qəhrəmanı Çingiz Qurbanovun əziz xatirəsi bir dəqiqəlik sükutla yad edildi.

Yığıncaqda “Xalçaçılar” ərazi ilk partiya təşkilatının sədri Fuad Rəsulov hesabatla çıxış etdi. 2016-cı ildə yaradılmış təşkilatda bir il ərzində görülmüş işlər, siyasi kampaniyalarda, xüsusən 26 sentyabr Referendumunda, rayon və respublika əhəmiyyətli tədbirlərdə partiya üzvlərinin fəal iştirakı haqqında ətraflı məlumat verildi. Azərbaycan Xalça Muzeyinin xalqımızın tarixi və mədəniyyətinin gələcək nəsillərə, xarici turistlərə təbliği baxımından yüksək səviyyəli fəaliyyətindən bəhs edən F.Rəsulov partiya mənsubiyyətləri ilə fəxr etdiklərini və gənclər olaraq ölkə rəhbəri cənab İlham Əliyevin çoxşaxəli siyasətini bundan sonra da dəstəkləkləyəcəklərini və bütün tapşırıqları əzmkarlıqla yerinə yetirməyə hazır olduqlarını vurğuladı.

Çıxış edən YAP Səbail rayon təşkilatı sədrinin birinci müavini Muxtar Nağıyev qeyd etdi ki, fərəhləndirici haldır ki, Azərbaycan incəsənətinin, mədəniyyətinin ocaqlarından biri olan Azərbaycan Xalça Muzeyinin kollektivi arasında Yeni Azərbaycan Partiyasının üzvlərinin sayı getdikcə artır. Tariximizi qorumaq, yaşatmaq hər birimizin vətəndaşlıq borcudur. Xalça Muzeyinin tikintisində, Azərbaycan xalçasının UNESCO-nun bəşəriyyətin qeyri maddi-mədəni irsi siyahısına daxil olunmasında Heydər Əliyev Fondunun, Azərbaycanın birinci xanımı Mehriban xanım Əliyevanın xidmətləri danılmazdır. Azərbaycan Respublikası Mədəniyyət və Turizm Nazirliyinin bu istiqamətdə gördüyü işlərdən danışan M.Nağıyev milli incəsənətimizin dünyaya tanıdılması üçün görülən tədbirlər, xarici ölkələrdə keçirilən sərgilər haqqında məlumat verdi.

Yığıncaq iştirakçıları “Xalçaçılar” ərazi ilk partiya təşkilatının hesabatını qənaətbəxş olaraq qiymətləndirdilər.

Sonra məruzələr ətrafında müzakirələr aparıldı və ərazi ilk partiya təşkilatının yeni tərkibi, rayon təşkilatının XI konfransına nümayəndələr seçildi.

Yığıncaqda Azərbaycan Xalça Muzeyində YAP sıralarına yeni qəbul olunan muzey əməkdaşlarına üzvlük vəsiqələri təqdim edildi.

 

• 
• 
• 
• 
• 
• 
• 
• 
• 
• 
•