Uşaqlar Mehriban xanım Əliyevaya minnətdarlıq etdilər
09.05.2018Səbail rayonu, Bayıl yaşayış sahəsində 100 il əvvəl inşa olunmuş binada yerləşən və Heydər Əliyev Fondu tərəfindən sökülərək müasir layihə əsasında yenidən tikilən və bu ilin mart ayının 6-da Fondun Prezidenti Mehriban xanım Əliyevanın iştirakı ilə istifadəyə verilmiş 157 nömrəli uşaq bağçasında Səbail rayon İcra Hakimiyyətinin dəstəyi ilə Ümummilli Lider Heydər Əliyevin anadan olmasının 95 illiyinə həsr olunmuş tədbir keçirildi.
İlk öncə, tədbirin qonaqları yeni bağça ilə tanış oldular. Bağçanın müdirəsi Banuçiçək Əzizova bildirdi ki, Heydər Əliyev Fondu tərəfindən 2 mərtəbəli qəzalı bağça binası sökülərək, yerində yeni 3 mərtəbəli, mansardlı müasir bina inşa olunmuş, Fond tərəfindən bura hər cür avadanlıqlarla təchiz olunmuş, uşaqların tədbiyəsi, istirahəti üçün hər cür şərait yaradılmışdır. Yeni bağçada keçirilən ilk tədbir isə məhz uşaqların böyük dostu olan Heydər Əliyevin 95 illik yubileyinə həsr olunmuşdur.
Banuçiçək Əzizova yeni bağçanın tikintisi və burada yaradılan şəraitə görə uşaqlar və onların valideynləri adından Heydər Əliyev Fondunun Prezidenti Mehriban xanım Əliyevaya dərin minnətdarlığını bildirdi.
Sonra Heydər Əliyevin uşaqlara qayğısını əks etdirən film nümayiş etdirildi, bağçada tərbiyə alan uşaqların ifasında Ulu Öndərə, Azərbaycana həsr olunmuş şerlər və mahnılar səsləndirildi, rəqslər ifa olundu.
Tədbirdə uşaqların ifaları qonaqlar və valideynlər tərəfindən böyük sevinclə və alqışlarla qarşılandı.
