Yeni Azərbaycan Partiyası Səbail rayon təşkilatı

Səbail rayon İcra Hakimiyyətində 2018-2019-cu illərin payız-qış mövsümünə hazırlığın yekunu, qış aylarında İcra Hakimiyyətinin, təsərrüfat xidmətlərinin, ayrı-ayrı idarə, müəssisə və təşkilatların qarşısında duran vəzifələrə həsr olunmuş iclas keçirildi.

İclasa sədrlik edən Səbail rayon İcra Hakimiyyətinin başçısı Vüqar Zeynalov bildirdi ki, mövsümə hazırlıqla əlaqədar rayon İcra Hakimiyyətində xüsusi Qərargah yaradılıb, tədbirlər planı təsdiq olunub. İclasda 2018-2019 payız-qış mövsümünə hazırlıqla bağlı görülmüş işlər haqqında geniş məlumat verildi, qış aylarında havaların kəskin soyuq, qarlı-şaxtalı keçən günlərində Qərərgah üzvlərinin, rayonun ayrı-ayrı təsərrüfat xidmətlərinin xüsusi rejimdə çalışacağı, yaranan çatışmamazlıqların aradan qaldırılması məqsədilə operativ tədbirlərin görüləcəyi bildirildi.

Qeyd olundu ki, əsas, köməkçi məhəllədaxili yolların, səkilərin qardan vaxtında təmizlənməsi üçün cavabdeh təşkilatlar müəyyənləşdirilib, rayon MKTB-nin tabeliyində olan xüsusi texnikalar tam işlək vəziyyətə gətirilib, inventar, qum və duz tədarükü görülüb, işçilər arasında xüsusi iş qrafiki və növbətçilik təsdiq olunub.

Şura iclasında Səbail Rayon Mənzil Kommunal Təsərrüfatı Birliyinin, Səbail rayon Sukanal İdarəsinin, Səbail Enerji Təchizatı və Satışı İdarəsinin, Bakı Regional Qaz İstismar Departamentinin, Səbail rayonu üzrə texniki istismarı xidmətinin, rayon İstilik Sistemləri İstismar Sahəsinin rəhbərləri çıxış etdilər. Kommunal xidməti təşkilatlarının rəhbərləri çıxışlarında 2018-2019-cu ilin payız-qış mövsümünə hazırlığın yekunu ilə əlaqədar tədbirlər planına uyğun görülmüş işlər və qarşıda duran vəzifələrin icrası barəsində məlumat verdilər.

İclasda rayon təsərrüfatının 2018-2019-cu ilin payız-qış mövsümünə hazırlığın yekununun vəziyyəti ilə əlaqədar müzakirələr və fikir mübadiləsi aparıldı. Müzakirələr zamanı məsələlərin həlli ilə bağlı aidiyyəti qurumların rəhbərlərinə müvafiq tapşırıqlar verilmişdir.

Bakı şəhər İcra Hakimiyyətinin şöbə müdirləri Coşqun Cəbrayılov və Ayaz Hüseynov, Bakı şəhər MKTD-nin rəisi Rəfail Mehralıyev çıxış edərək şəhər təsərrüfatının payız-qış mövsümündə normal fəaliyyətinin təmin edilməsi üçün zəruri tədbirlərin həyata keçirilməsinin vacibliyini, bütün təsərrüfat subyektlərində qışa hazırlığa dair təxirəsalınmaz tədbirlərin görülməsi barədə tövsiyyə və tapşırıqları nəzərə çatdırdılar və bu işlərin şəhər üzrə yaradılmış Qərərgah tərəfindən koordinasiya olunduğunu bildirdilər.

 

• 
• 
• 
•