Yeni Azərbaycan Partiyası Səbail rayon təşkilatı

15 fevral 2019-cu il tarixində YAP Səbail rayon Qadınlar Şurasının İdarə Heyətinin iclası keçirildi.

Çıxış edən rayon partiya təşkilatının Qadınlar Şurasının sədri Təranə Kərimova Qadınlar Şurasının 2019-cu il üçün hazırlanmış fəaliyyət planı haqqında məlumat verərək əminliyini ifadə etdi ki, hər il olduğu kimi bu il də Səbail qadınları həm rayonumuzun, həm də respublikamızın ictimai-siyasi həyatında fəal iştirak edəcəklər. Bildirildi ki, 2019-cu il üçün hazırlanmış çoxistiqamətli fəaliyyət planında Ulu Öndər Heydər Əliyev və görkəmli oftalmoloq alim, akademik Zərifə xanım Əliyevanın anadan olmalarının 96-cı ildönümünə həsr olunan tədbirlərin, ölkəmizdə elan olunmuş “Nəsimi ili” çərçivəsində silsilə maarifləndirici konfrans, seminar və “dəyirmi masa”ların, görüşlərin təşkili, eləcə də bu il ölkəmizdə keçiriləcək Bələdiyyə seçkiləri ilə əlaqədar Səbail rayonunda Yeni Azərbaycan Partiyasından bələdiyyələrə irəli sürüləcək olan qadın namizədlərin dəstəklənməsi üçün geniş təbliğat-təşviqati işləri nəzərdə tutulmuşdur. Eyni zamanda, qadınlar YAP Səbail rayon təşkilatının yaradılmasının 26-cı ildönümünün qeyd olunması ilə əlaqədar aparılan hazırlıq işlərində, “8 mart – Beynəlxalq Qadınlar Günü”nün ənənəvi olaraq xüsusi qeyd olunmasında, eləcə də Azərbaycanın görkəmli qadın ictimai-siyasi xadimləri ilə görüşlərin, maarifləndirici tədbirlərin, cəbhə bölgələrinə səfərlərin təşkilində yaxından iştirak edəcəklər. Bu fəaliyyətlərlə yanaşı Səbail qadınları sosialyönümlü fəaliyyətlərinə davam edəcək, ötən illərdə olduğu kimi bu il də rayonun xüsusi yardıma ehtiyacı olan aztəminatlı sakinlərini, imkansız ailələri diqqət və qayğı mərkəzində saxlayacaqlar. T.Kərimova Qadınlar Şurası üzvlərinin sosial şəbəkələrdə də fəallıqlarını artırmalarına ehtiyac olduğunu diqqətə çatdırdı.

Sonra YAP Səbail rayon Qadınlar Şurasının 2019-cu il üçün fəaliyyət planı istiqamətlər üzrə müzakirə olundu, qadınların rəy və təklifləri dinlənildi. Fəaliyyət planı yekdilliklə təsdiq olundu.