İmadəddin Nəsiminin 650 illik yubileyinə həsr olunmuş “Ənəlhəqq” teatr tamaşası nümayiş olundu
16.05.2019Bakı Dövlət Universitetində Azərbaycan xalqının ədəbi və fəlsəfi fikir tarixində dərin iz qoymuş mütəfəkkir şair İmadəddin Nəsiminin 650 illik yubileyinə həsr olunmuş “Ənəlhəqq” teatr tamaşası nümayiş olundu.
Tədbirdə Milli Məclisin deputatı, YAP Səbail rayon təşkilatının sədri prof. Şəmsəddin Hacıyev, BDU-nun rektoru Elçin Babayev və universitetin müəllim-tələbə heyəti iştirak etdi.
Jurnalistika fakültəsinin və Tələbə Həmkarlar İttifaqı Komitəsinin birgə təşkilatçılığı ilə hazırlanmış və nəzmlə yazılmış tamaşada Nəsimi fəlsəfəsi, onun ideologiyasının dünyəviliyi, o vaxtki qəddar rejimə, tökülən qanlara, insanın öz həqiqi mənliyindən çıxıb vəhşiyə dönməsinə qarşı Nəsiminin üsyankarlığı əsas götürülüb. Tamaşada mürid və mürşid, despot şah və həqiqət tələb edən şair, xeyir və şər, aşiq və məşuq münasibətləri verilib. Tamaşanın səhnələşdirilməsində və ifasında YAP Səbail Könüllülər Birliyinin üzvləri də iştirak edirlər.
“Ənəlhəqq” tamaşasının layihə rəhbərləri Elcan Məmmədov, Fəhruz Rzayev və Rəhman Mirzəlizadə, quruluşçu rejissoru isə Cavidan Kəsəmənlidir. Tamaşa izləyicilər tərəfindən böyük maraqla qarşılandı.
Çıxış edən prof. Şəmsəddin Hacıyev, Elçin Babayev və Jurnalistika fakültəsinin dekanı Vüqar Əliyev tamaşanı yüksək qiymətləndirərək tələbələri təbrik etdilər və onlara uğurlar arzuladılar.
