Yeni Azərbaycan Partiyası Səbail rayon təşkilatı

22 may 2019-cu il tarixində AMEA-nın Mərkəzi Nəbatat Bağında YAP Səbail rayon “Nəbatat bağı” ərazi ilk partiya təşkilatının təsis yığıncağı keçirildi.

Təsis yığıncağında YAP Səbail rayon təşkilatının Aparat rəhbəri dos. Zəfər Bayramov və Mərkəzi Nəbatat Bağının direktor vəzifəsini icra edən, biologiya elmləri doktoru, dos. Vahid Fərzəliyev iştirak etdilər.

Yığıncağı açıq elan edən YAP Səbail rayon təşkilatının Aparat rəhbəri dos. Zəfər Bayramov Milli Məclisin deputatı, YAP Səbail rayon təşkilatının sədri prof. Şəmsəddin Hacıyevin adından Mərkəzi Nəbatat Bağının rəhbərliyini və kollektivini ürəkdən salamlayaraq bildirdi ki, AMEA-nın bir çox qurumlarında YAP Səbail rayon təşkilatının qeydiyyatında olan ərazi ilk partiya təşkilatları fəaliyyət göstərir və elm adamlarının, ziyalıların partiya sıralarına cəlb olunması Yeni Azərbaycan Partiyasının üzv tərkibində müsbət keyfiyyət dəyişikliklərinə səbəb olur. Bu səbəblə, AMEA-nın Mərkəzi Nəbatat Bağında ərazi ilk partiya təşkilatının yaradılması haqqında qurum rəhbərliyindən rayon partiya təşkilatına daxil olan müraciət məmnunluqla qəbul olunmuşdur.

Sonra Z.Bayramov Ulu Öndər Heydər Əliyevin bilavasitə təşəbbüsü və rəhbərliyi ilə 1992-ci ildə yaranan, 1993-cü ildən iqtidar partiyası olan və Azərbaycanın ictimai-siyasi həyatının istisnasız olaraq bütün sahələrində aparıcı rol oynayan Yeni Azərbaycan Partiyasının keçdiyi zəngin və şərəfli inkişaf yolu, partiyanın çoxşaxəli fəaliyyəti haqqında yığıncaq iştirakçılarına geniş məlumat verərək diqqətə çatdırdı ki, bu gün YAP sıralarında 740 mindən çox partiya üzvü cəmləşmişdir. Partiyanın hazırda 84 şəhər və rayon partiya təşkilatları və 8 mindən çox ərazi ilk partiya təşkilatları fəaliyyət göstərir. 26 mindən çox partiya üzvünü birləşdirən YAP Səbail rayon təşkilatının sıraları həm kəmiyyət, həm də keyfiyyət baxımından ildən-ilə genişlənir. Bu gün təsis olunan ərazi ilk partiya təşkilatının AMEA ilə YAP Səbail rayon təşkilatı arasında ideoloji, maarifləndirici, elmi-metodoloji əməkdaşlığın daha da inkişafına əvəzolunmaz töhfələri olacağına əminliyini ifadə edən Z.Bayramov Mərkəzi Nəbatat Bağının bütün əməkdaşlarına cansağlığı və gələcək fəaliyyətlərində uğurlar arzuladılar.

Yığıncağın davamında “Nəbatat bağı” ərazi ilk partiya təşkilatının təsis olunması ilə bağlı səsvermə keçirildi, təşkilat təsis edildi və Mərkəzi Nəbatat Bağının direktor vəzifəsini icra edən, biologiya elmləri doktoru, dos. Vahid Fərzəliyev yekdilliklə yeni ərazi təşkilatının sədri seçildi.

Çıxış edən ərazi ilk partiya təşkilatının sədri dos. Vahid Fərzəliyev ona göstərilən yüksək etimada görə təşəkkür etdi və ümidvar olduğunu bildirdi ki, “Nəbatat bağı” ərazi ilk partiya təşkilatı rayonun ictimai-siyasi həyatında yaxından iştirak edən ən fəal və nümunəvi təşkilatlardan biri olacaqdır. AMEA-nın Mərkəzi Nəbatat Bağının fəaliyyəti haqqında məlumat verən V.Fərzəliyev bildirdi ki, 45 hektardan çox geniş ərazini əhatə edən və nadir bitkilərin xüsusi diqqətlə qorunduğu Nəbatat Bağına hər il 40-50 mindən çox ziyarətçi gəlir, yüzlərlə tələbə burada praktik təcrübə keçir. Geniş ictimai fəaliyyətə malik olan Nəbatat Bağı bugündən etibarən siyasi proseslərdə də yaxından iştirak edəcək və Yeni Azərbaycan Partiyasının müstəqil Azərbaycan dövlətçiliyinin, Azərbaycan xalqının mənafeyinə xidmət edən fəaliyyətinə öz töhfələrini verəcəkdir.

Yığıncaq gələcək fəaliyyət istiqamətlərinin müzakirəsi ilə davam etdi.

 

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•