Yeni Azərbaycan Partiyası Səbail rayon təşkilatı

İyulun 8-də Azərbaycan Respublikası Təhsil İnstitutunda YAP Səbail rayon təşkilatının birgə təşkilatçılığı ilə görkəmli ictimai-siyasi xadim, pedaqoq, Ulu Öndər Heydər Əliyevin yaxın silahdaşlarından biri, Yeni Azərbaycan Partiyasının yaradılmasında yaxından iştirak edən, Azərbaycan Respublikasının Əməkdar müəllimi, pedaqoji elmlər doktoru, YAP Səbail rayon təşkilatına 22 il rəhbərlik etmiş ilk sədr, “Şöhrət” və “Şərəf” ordenli pedaqogika üzrə elmlər doktoru, mərhum professor Zahid İbrahim oğlu Qaralovun anadan olmasının 85 illik yubileyinə və pedaqoji irsinə həsr olunmuş elmi-praktik seminar təşkil olundu.

Tədbirdə YAP Səbail rayon təşkilatının sədri, Milli Məclisin deputatı prof. Şəmsəddin Hacıyev iştirak etdi.

Tədbiri giriş sözü ilə açan institutun direktor müavini, dosent Ənvər Abbasov tədbirin əhəmiyyətindən, gənc nəsillər üçün örnək olmasından danışdı.

Çıxış edən YAP Səbail rayon təşkilatının sədri, Milli Məclisin deputatı, iqtisad elmləri doktoru, professor Şəmsəddin Hacıyev mərhum professor Zahid Qaralovun çoxşaxəli ictimai-siyasi fəaliyyəti, partiyanın yaranmasında xidmətləri, Ümummilli Lider Heydər Əliyevin yaxın silahdaşı olması, Milli Məclisin deputatı kimi fəaliyyəti, Bələdiyyə qanunlarının hazırlanması sahəsində gördüyü işlər, “Təhsil haqqında” qanunun yaradılmasında irəli sürdüyü təkliflər, dövlətə və dövlətçiliyə sədaqəti, YAP Səbail rayon təşkilatının yaradılmasındakı xidmətləri və rayon partiya təşkilatına 22 il uğurla rəhbərlik etməsi haqqında ətraflı məlumat verdi.

Sonra YAP Səbail rayon “Təhsil tədqiqatçıları” ərazi ilk partiya təşkilatının sədri, professor Piralı Əliyev “Professor Zahid Qaralovun həyat və yaradıcılığı” mövzusunda məruzə-təqdimatla çıxış etdi. Təqdimat PDF şəklində əlavə olunur.

Professorlar V.Xəlilov, A.Abbasov, V.Orucov,İ.Cəbrayılov, H.Əhmədov, dosentlərdən Ə.İmanov, M.İbadova, A.Bəkirova,  R.Qəndilov, Ə.Gərayev, institutun direktor müavini A. Nağıyev, şöbə müdiri R.Əsgərov çıxış edərək Prof. Zahid Qaralovla bağlı xatirələrini və pedaqoji elmə gətirdiyi yeniliklərdən səhbət açdılar. Vurğulandı ki. prof. Z.Qaralovun ideyaları hər zaman öz aktuallığını qoruyacaq və gənc tədqiqatçılar üçün uzun illər əsas istinad mənbəyi olacaqdır.

Tədbirin sonunda professor Zahid Qaralovun oğlu İlqar Qaralov çıxış edənlərin hər birinə ailəsi adından minnətdarlıqlarını bildirdi.

 

• 
• 
• 
• 
• 
• 
• 
• 
• 
•