Yeni Azərbaycan Partiyası Səbail rayon təşkilatı

Dekabrın 10-da YAP Səbail rayon təşkilatının və Azərbaycan Respublikasının Prezidenti yanında Dövlət İdarəçilik Akademiyasının birgə təşkilatçılığı ilə müasir Azərbaycan dövlətinin qurucusu və Yeni Azərbaycan Partiyasının yaradıcısı Ulu Öndər Heydər Əliyevin əbədiyaşar xatirəsinə həsr olunan anım tədbiri keçirildi.

Tədbirdə Milli Məclisin deputatı, YAP Səbail rayon təşkilatının sədri, iqtisad elmləri doktoru, prof. Şəmsəddin Hacıyev və Azərbaycan Respublikasının Prezidenti yanında Dövlət İdarəçilik Akademiyasının rektoru akademik Urxan Ələkbərov iştirak etdilər.

İlk öncə Azərbaycan xalqının Ümummilli Lideri Heydər Əliyevin əziz xatirəsi bir dəqiqəlik sükutla yad olundu.

Sonra Ulu Öndər Heydər Əliyevin zəngin dövlətçilik fəaliyyətinə həsr olunan videofilm nümayiş olundu.

Tədbiri açıq elan edən Azərbaycan Respublikasının Prezidenti yanında Dövlət İdarəçilik Akademiyasının rektoru akademik Urxan Ələkbərov Ulu Öndər Heydər Əliyevin Azərbaycanın müasir siyasi tarixindəki əvəzolunmaz xidmətlərindən danışdı. Müasir iqtisadi inkişafımızın əsasını təşkil edən Heydər Əliyev neft strategiyasının və “Əsrin müqaviləsi”nin imzalanmasının əhəmiyyətini xüsusi qeyd edən rektor bildirdi ki, Prezident İlham Əliyev Ulu Öndərin siyasətini və yolunu yeni müstəvidə uğurla davam etdirir. Bu gün Azərbaycan dünyada tanınan, beynəlxalq münasibətlərdə öz sözü və yeri olan, dinamik inkişaf edən modern və güclü dövlətə çevrilib. Rektor qeyd etdi ki, Azərbaycanın müasir tarixində Ulu Öndər Heydər Əliyevin müstəsna xidmətlərinin ictimai-siyasi mahiyyəti hələ uzun illər tədqiqatçıların diqqət mərkəzində olacaq. Müasir Azərbaycan dövlətinin memarı və qurucusu Heydər Əliyevin xatirəsi daim xalqımızın yaddaşında, ürəklərdə yaşayacaq.

Çıxış edən prof. Şəmsəddin Hacıyev bütün varlığı ilə müstəqil Azərbaycan dövlətçiliyinə bağlı olan Ümummilli Lider Heydər Əliyevin Azərbaycana rəhbərlik etdiyi hər iki hakimiyyət dövründə taleyin hökmü ilə Azərbaycan xalqı və milli dövlətçiliyimiz üçün yerinə yetirdiyi böyük tarixi missiyalardan geniş danışdı. Ulu Öndər Heydər Əliyevin sözün əsl mənasında müstəqil Azərbaycan dövlətinin qurucusu olduğunu qeyd edən deputat bildirdi ki, dinamik inkişaf edən və ildən-ilə siyasi, iqtisadi, beynəlxalq nüfuzu yüksələn müasir Azərbaycanın müstəqillik dövründə əldə etdiyi bütün uğurların bünövrəsi dahi siyasətçi və görkəmli dövlət xadimi Heydər Əliyev amili və Heydər Əliyev şəxsiyyəti ilə bağlıdır. Ş.Hacıyev vurğuladı ki, zaman keçdikcə biz Heydər Əliyev dühasının əzəmətini, böyüklüyünü daha çox hiss edir, həyata keçirdiyi çoxşaxəli işlərin, xalqımız və müstəqil dövlətçiliyimiz üçün ən çətin, taleyüklü anlarda yerinə yetirdiyi xilaskarlıq missiyalarının nəhəngliyini daha dərindən dərk edirik. Azərbaycan xalqı Ulu Öndər Heydər Əliyevin əbədiyaşar xatirəsini ehtiramla yaşadır və hər bir Azərbaycan vətəndaşı böyük qürur və fərəh hissi ilə hər zaman qeyd edir ki, nə yaxşı ki, müstəqil dövlətçiliyimizin ən mürəkkəb, taleyüklü məsələlərinin həll olunduğu şəraitdə Azərbaycan xalqına Heydər Əliyev kimi böyük və cəsarətli Lider olub.

Ulu Öndər Heydər Əliyev zəngin dövlətçilik və idarəçilik irsi haqqında tədbir iştirakçılarına xronoloji ardıcıllıqla geniş və ətraflı məlumat verən Ş.Hacıyev Sovet dövründə Heydər Əliyevin yalnız şəxsi bacarığı, istedadı və işgüzarlığı ilə gənc yaşlarından etibarən dünyanı idarə edən iki nəhəng dövlətdən birinin ən yüksək rəhbər vəzifələrinə qədər yüksələn ilk müsəlman-türk, azərbaycanlı olmasını, 1969-cu ildə müttəfiq respublikalar arasında ən geridə qalmış aqrar-xammal ölkələrindən biri olan Azərbaycana rəhbər təyin olunmasından sonra cəmi 13 il ərzində Azərbaycan SSR-i Sovet respublikaları sırasında ən sürətlə inkişaf edən və özünü tam təmin edən sənaye respublikasına çevirməsini, SSRİ kimi fövqəldövlətdə yüksək məsuliyyət tələb edən elm, təhsil, mədəniyyət, nəqliyyat, maşınqayırma, dəmir yolları və digər mühüm strateji sahələrə məhz Heydər Əliyevin rəhbərlik etməsini və bu sahələrin inkişafında əhəmiyyətli nəticələrin əldə edilməsini xüsusi vurğuladı.

Millət vəkili Azərbaycanın müstəqilliyini bərpa etdikdən sonra Heydər Əliyevin xalqın istəyi və dəstəyi ilə 1993-cü ilin iyununda ölkəmizdə hakimiyyətə gəlməsini onun tarixi qurtuluş missiyasının başlanğıcı olduğunu diqqətə çatdırdı. 1992-ci ilin 21 noyabr tarixində Heydər Əliyevin təşəbbüsü və bilavasitə rəhbərliyi ilə Yeni Azərbaycan Partiyasının təsis olunmasını və qısa müddətdə xalqın dəstəyi ilə iqtidar partiyasına çevrilməsini Azərbaycanın siyasi tarixində mühüm hadisə kimi vurğulayan Ş.Hacıyev bildirdi ki, Azərbaycana rəhbərlik etdiyi 10 il ərzində Ulu Öndər ölkəmizi düşdüyü bəlalardan, tənəzzüldən, sözün əsl mənasında yox olmaq, məhv olmaq və dünyanın siyasi xəritəsindən silinmək təhlükəsindən xilas etdi. Heydər Əliyev son dərəcə mürəkkəb siyasi və iqtisadi şəraitdə Azərbaycanın müstəqilliyini qorudu, möhkəmləndirdi və ölkəmizi iqtisadi tənəzzüldən sürətli inkişaf və tərəqqi yoluna çıxartdı. Deputat Heydər Əliyevin müasir müstəqil Azərbaycan dövlətçiliyinin inkişafı üçün hazırladığı fundamental siyasi və iqtisadi bazanın tərkib elementlərini təhlil edərək, Ulu Öndərin misilsiz xidmətləri sırasında Onun şəxsi nüfuzu və siyasi iradəsi nəticəsində 1994-cü ildə Azərbaycanın iqtisadi müstəqilliyinin əsasını təmin edən “Əsrin Müqaviləsi”nin imzalanmasının, 1995-ci ildə sivil, demokratik və milli maraqlara cavab verən, ölkədə siyasi sistemin əsaslarını müəyyənləşdirən, bütün prosesləri və münasibətlər sistemini tənzimləyən mükəmməl qanunvericilik bazasının yaradılmasını təmin edən müstəqil Azərbaycanın yeni Konstitusiyasının hazırlanması və qəbulunun, ölkədə bazar iqtisadiyyatına keçid üçün zəruri olan institutların və infrastrukturun yaradılmasının, cəmiyyət həyatının bütün sahələrini əhatə edən geniş və sistemli islahatlar proqramının həyata keçirilməsinin, eləcə də həmin dövrdə Azərbaycanın milli və azərbaycançılıq ideologiyasının formalaşdırılması və bütün cəmiyyətin bu ideyalar ətrafında birləşdirilməsinin əhəmiyyətini xüsusi olaraq qeyd etdi.

Ulu Öndər Heydər Əliyevin Azərbaycan xalqı qarşısındakı daha bir tarixi missiyasının – sağlığında özünün siyasi varisini müəyyənləşdirməsi olduğunu diqqətə çatdıran Ş.Hacıyev qeyd etdi ki, zaman bu seçimin nə dərəcədə düzgün, müdrik və uzaqgörən qərar olduğunu sübuta yetirdi. Azərbaycan xalqına firavan həyat və güclü dövlət bəxş etmiş Heydər Əliyev siyasəti bu gün möhtərəm Prezidentimiz cənab İlham Əliyev tərəfindən tamamilə yeni keyfiyyət müstəvisində dünyada gedən proseslər və yeni çağırışlar əsasında uğurla davam etdirilir. Ölkə başçısının rəhbərliyi ilə Azərbaycanda son 16 ildə möhtəşəm işlər görülmüş, ən böyük dəyərimiz olan ictimai-siyasi sabitliyimiz təmin olunmuş, iqtisadiyyatımız sürətlə inkişaf etmiş, beynəlxalq aləmdə Azərbaycan etibarlı tərəfdaş kimi nüfuzu xeyli yüksəlmişdir. 2018-ci ildən etibarən ölkəmizdə davamlı, tarazlı, şaxələndirilmiş inkişaf və cəmiyyət həyatının bütün sahələrini əhatə edən əsaslı islahatlar həyata keçirilir və müsbət nəticələr də göz önündədir. Azərbaycan öz inkişaf yolu ilə gedir, bu yol Heydər Əliyev yolu və İlham Əliyevin cəsarətli, müstəqil, uzaqgörən siyasət yoludur. Bu siyasət Azərbaycanı gələcəkdə də çox uğurlara aparacaq.

Ulu Öndər Heydər Əliyevi bir daha qürurla və ehtiramla yad edən Ş.Hacıyev vurğuladı ki, Azərbaycan xalqının dahi oğlu Heydər Əliyev tarixi şəxsiyyət olmaqla yanaşı, həm də tarixin gedişatını dəyişən və Azərbaycanın yeni tarixini yaradan rəhbərdir. Nə qədər ki, Azərbaycan var, o qədər də Heydər Əliyev ideyaları yaşayacaq və Heydər Əliyevin qurub yaratdığı Azərbaycan vaxt gələcək dünyanın ən inkişaf etmiş ölkələrindən olacaq. Allah Ümummilli Liderimizə qəni-qəni rəhmət eləsin! Ruhu şad olsun!

YAP Səbail rayon “İdarəedicilər” ərazi ilk partiya təşkilatının sədri, Azərbaycan Respublikasının Prezidenti yanında Dövlət İdarəçilik Akademiyasının fakültə dekanı, siyasi elmlər doktoru, prof. Elçin Əhmədov bildirdi ki, otuz beş ilə yaxın bir müddətdə Azərbaycanın taleyi dahi şəxsiyyət, görkəmli dövlət xadimi Heydər Əliyevlə bağlı olub. Ümummilli lider Heydər Əliyevin zəngin irsi müstəqil Azərbaycan dövlətinin inkişaf və tərəqqisi yolunda, indiki və gələcək nəsillər üçün əvəzsiz sərvət, böyük qürur və iftixar mənbəyidir. Bu irsi öyrənmək və təbliğ etmək bizim hər birimizin məsul və şərəfli borcudur. Ümummilli lider Heydər Əliyevin müdrik rəhbərliyi, həyata keçirdiyi düşünülmüş, məqsədyönlü tədbirləri hesabına 1969-1982-ci illər Azərbaycanın intibah dövrü kimi tarixə düşüb.

Professor qeyd etdi ki, 1993-cü ilin ikinci yarısında ümummilli lider Heydər Əliyevin yenidən hakimiyyətə qayıdışı Azərbaycanda müstəqil dövlətçilik ideyalarının bərqərar olmasına şərait yaradıb. Ümummilli lider Heydər Əliyevin ölkəmizə rəhbərlik etdiyi 1993-2003-cü illərdə respublikamız üçün həlledici illər olub. Məhz həmin illərdə dövlətçiliyimizin möhkəm təməli qoyulub. O illərdə Azərbaycanın istər daxili, istərsə də xarici siyasətlə bağlı strateji xətti müəyyən edilib, Azərbaycan dünya birliyinə qovuşub.

Ümummilli lider Heydər Əliyev tərəfindən əsası qoyulmuş siyasi kursun son 16 ildə Prezident İlham Əliyev tərəfindən dinamik şəkildə və novatorcasına inkişaf etdirilməsi nəticəsində Azərbaycanın çox böyük uğurlara imza atması ölkəmizin dünya birliyində mövqelərinin yüksəlməsini təmin edib. Həyata keçirilən qlobalmiqyaslı tədbirlər bu gün Azərbaycanın dünya miqyasında nüfuzunu xeyli artırıb, ölkəmizin Cənubi Qafqaz regionunda lider dövlətə çevrilməsini şərtləndirib.

Çıxış edən Azərbaycan Respublikasının Prezidenti yanında Dövlət İdarəçilik Akademiyasının “Siyasi idarəetmə” fakültəsinin III kurs tələbəsi İlahə Balakişiyeva Ulu Öndər Heydər Əliyevin zəngin dövlətçilik irsinin gənclər üçün böyük nümunə təşkil etməsi, Heydər Əliyevin şah əsəri olan müasir Azərbaycanın hər bir Azərbaycanlı gənc üçün fəxr və qürur mənbəyi olması, ölkəmizdə Heydər Əliyevin banisi olduğu dövlət gənclər siyasəti və bu siyasətin ölkə Prezidenti İlham Əliyev tərəfindən layiqincə davam etdirməsi haqqında danışdı. Bildirildi ki, bu gün vətənpərvərlik ruhunda formalaşan Azərbaycan gəncliyi ölkəmizin son 16 ildə əldə etdiyi misilsiz nailiyyətlərdən ruhlanır və onlara göstərilən yüksək etimada layiq olmağa çalışır.

Tədbirin sonunda Yeni Azərbaycan Partiyası sıralarına yeni qəbul olunan Dövlət İdarəçilik Akademiyasının tələbələrinə partiya üzvlük vəsiqələri təqdim olundu.

”Səs” qəzeti
”Yeni Azərbaycan” qəzeti
yap.org.az
AzərTAC

 

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•