YAP Səbail rayon “Akademik Filarmoniya” ərazi ilk partiya təşkilatının üzvü, Vətən müharibəsi qazisi Eyvazov Firdovsi Təvəkkül oğlu ilə görüş keçirildi
16.02.2021Fevralın 16-da YAP Səbail rayon “Akademik Filarmoniya” ərazi ilk partiya təşkilatının təşəbbüsü ilə “Şəhid ailələrinə və Vətən müharibəsi qazilərinə dəstək” layihəsi çərçivəsində təşkilatın ən gənc üzvü, Vətən müharibəsi qazisi, Xocavəndin və Füzulinin azad olunmasına görə medalları ilə təltif olunmuş, Azərbaycan Dövlət Mahnı və Rəqs ansamblının rəqqası Eyvazov Firdovsi Təvəkkül oğlu ilə görüş keçirildi. Görüşdə Filarmoniyanın direktoru Xalq artisti Murad Adıgözəl-zadə, direktor müavini Afət Mikayılov və təşkilatın sədri Elçin Abbasov iştirak etdilər.
Görüş zamanı Firdovsi müharibə xatirələrini bölüşərək, Azərbaycan Ordusunun Şanlı Qələbəsi, torpaqlarımızın işğaldan azad olunması və cəbhə yoldaşlarının döyüş meydanındakı şücaəti, qəhrəmanlığı haqqında danışdı.
Söhbət əsnasında qazinin sağlıq durumu və gündəlik qayğıları ilə maraqlanıldı. Qəhrəman qazimiz, müharibədən qayıtdığı gündən hər zaman diqqət mərkəzində olduğunu, hər kəsin ona maddi və mənəvi dəstək olduqlarını vurğulayaraq hamıya öz təşəkkürünü bildirdi. Sonda gənc partiya üzvünə Fəxri Fərman və maddi yardım təqdim olundu.
