Yeni Azərbaycan Partiyası Səbail rayon təşkilatı

Prezident İlham Əliyev tərəfindən 2021-ci ilin “Nizami Gəncəvi İli” elan edilməsi ilə əlaqədar müxtəlif müəssisə və təşkilatlarda tədbirlər, layihələr həyata keçirilir.

Azərbaycan Dövlət İqtisad Universiteti nəzdində Azərbaycan Maliyyə-İqtisad Kollecində mütəfəkkir şair Nizami Gəncəvinin 880 illiyinə həsr edilmiş tədbir keçirildi.

Tədbirdə kollecin direktoru dos. Oruc Məmmədov çıxış edərək dahi şairimiz Nizami Gəncəvinin həyat və yaradıcılığı haqqında ətraflı məlumat verdi.

Universitetin kolleclər üzrə məsləhətçisi prof. Nuru Mikayılov bu səpkili tədbirlərin gənc nəslin milli ruhda təlim-tərbiyəsindəki önəminə diqqət çəkərək Azərbaycan ədəbiyyat tarixinə qızıl hərflərlə həkk olunmuş Nizami irsinin öyrənilməsi və təbliği istiqamətində dövlət səviyyəsində həyata keçirilən tədbirləri yüksək qiymətləndirdi.

Nizaminin zəngin ədəbi irsi haqqında danışan direktor müavini t.f.d. Murad Muradov bildirdi ki, mütəfəkkir şairin fəaliyyəti Azərbaycanın və Qafqazın ən iri şəhəri, eyni zamanda Yaxın və Orta Şərqin mühüm mədəniyyət mərkəzi Gəncə ilə bağlı olmuşdur.

Kollecin Azərbaycan dili və Ədəbiyyat müəllimi Alıyeva Aygün çıxışında vurğuladı ki, Nizami Gəncəvinin qəzəlləri başlıca olaraq dünyəvilik və ülvi məhəbbətin tərənnümünə həsr olunmuşdur.

Tədbirdə kollecin tələbələri çıxış edərək Nizaminin qəzəllərini, rübailərini, qəsidələrini səsləndirdilər.

Sonda dahi sənətkara həsr olunan videoçarx nümayiş olundu.

 

• 
• 
• 
• 
• 
•