Yeni Azərbaycan Partiyası Səbail rayon təşkilatı

İyunun 14-də “Azərbaycan Xəzər Dəniz Gəmiçiliyi” QSC-də (ASCO) YAP Səbail rayon təşkilatının və ASCO-nun birgə təşkilatçılığı ilə 15 iyun – Milli Qurtuluş Gününə həsr olunmuş tədbir keçirildi.

Tədbir Zəfərlə yekunlaşan 44 günlük Vətən müharibəsində döyüşərək qəhrəmancasına həlak olan Şəhidlərimizin xatirəsini bir dəqiqəlik sükutla yad etməklə başladı.

Çıxış edən ASCO-nun sədri Rauf Vəliyev Azərbaycan tarixində mühüm rol oynayan 15 iyun – Milli Qurtuluş Günü barədə ətraflı məlumat verdi. Bildirildi ki, 1993-cü ildə Ulu Öndər Heydər Əliyevin ikinci dəfə hakimiyyətə qayıdışı ölkəmizi böyük bir fəlakətdən xilas etdi, vətəndaş müharibəsinin, dövlətçiliyin məhv olmasının və ölkənin parçalanmasının qarşısı alındı.

Sədr qeyd etdi ki, 1993-cü ilin 15 iyunundan başlayan şərəfli yol bu gün də davam etdirilir. Ölkəmizin hazırkı tərəqqisi, Prezident İlham Əliyevin siyasəti Ulu öndərimizin dəsti-xəttindən qaynaqlanır və güc alır.

Xalqımıza 44 günlük Vətən müharibəsində əldə edilən qalibiyyəti bəxş etməklə Ali Baş Komandanımız İlham Əliyev həm də həyatını Azərbaycana həsr edən, “Şuşasız Qarabağ, Qarabağsız Azərbaycan yoxdur” deyən Ulu Öndərin arzusunu reallaşdırdı.

Rauf Vəliyev bildirdi ki, çoxminli dənizçi kollektivi, ASCO ailəsi də hər zaman Ulu öndər Heydər Əliyevə və onun siyasi kursunun davamçısı Prezident İlham Əliyevə sadiqdir.  Təsadüfi deyil ki, dəniz nəqliyyatı işçiləri arasında dahi şəxsiyyət Heydər Əliyevin qurucusu olduğu Yeni Azərbaycan Partiyasına üzv olanların sayı gündən-günə artır. Üzvlərin əksəriyyətini gənclər təşkil edir. Bu da onu göstərir ki, ASCO gəncləri bugünün və sabahın partiyasına böyük inam və etimad bəsləyir. Bu inamın və etimadın kökündə isə uğurlu siyasət və idarəçilik dayanır.

Yeni Azərbaycan Partiyası Səbail rayon təşkilatının sədri prof. Şəmsəddin Hacıyev çıxışında Milli Qurtuluş Gününün Azərbaycanın müasir tarixinin ən əhəmiyyətli günlərindən biri olduğunu vurğuladı. Ş.Hacıyev Ümummilli Lider Heydər Əliyevin xalqın təkidli tələbi ilə hakimiyyətə qayıdışından sonra ölkəmizin bir çox bəlalardan xilas olaraq inkişaf yoluna qədəm qoyduğunu, respublikamızda mühüm siyasi və iqtisadi islahatların həyata keçirildiyini bildirdi. Qeyd olundu ki, Ulu Öndərin müstəqil dövlət quruculuğu konsepsiyası müasir Azərbaycanın zəfərlərinin bünövrəsində dayanaraq gələcək inkişafın əsasını qoyub.

Sonra Yeni Azərbaycan Partiyası Səbail rayonu “Xəzər dənizçiləri” ərazi ilk təşkilatının hesabat-seçki yığıncağının qərarı tədbir iştirakçılarının diqqətinə çatdırılıb. Bildirildi ki, ASCO-nun veteran əməkdaşı İzafət Məmmədov öz müraciətinə uyğun olaraq Yeni Azərbaycan Partiyası Səbail rayon “Xəzər Dənizçiləri” ərazi ilk təşkilatının idarə heyətinin sədri vəzifəsindən azad edilib. Məxfi rejim və hərbi səfərbərlik şöbəsinin rəisi, Vətən müharibəsi iştirakçısı Rəşad Hüseynov yekdilliklə yeganə namizəd olaraq YAP Səbail rayonu üzrə “Xəzər dənizçiləri” ərazi ilk partiya təşkilatı İdarə Heyətinin sədri seçildi.

Çıxış edən İzafət Məmmədov “Xəzər dənizçiləri” ərazi ilk təşkilatının gördüyü mühüm işlərdən, qazanılan uğurlardan söz açdı. O, təşkilatın İdarə Heyətinin yeni sədri Rəşad Hüseynova uğurlar arzulayıb.

Rəşad Hüseynov  öz növbəsində ona göstərilən etimada görə təşəkkürünü bildirdi.

Tədbirin sonunda Milli Qurtuluş Gününə həsr olunan videoçarx nümayiş etdirildi.

https://www.asco.az/

 

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•